Il-Ministeru għar-Riżorsi u l-Affarijiet Rurali jagħmel referenza għall-konferenza tal-aħbarijiet tal-Kunsill Lokali ta’ Marsaxlokk.

Il-Ministeru jixtieq jirrimarka li wara li s-sena l-oħra tlestiet l-ewwel fażi tal-proġett ta’ tisbiħ f’Marsaxlokk, fejn sar twessieħ tal-bankina ta’ man-naħa tad-djar, ħwienet u restoranti, il-Gvern beda konsultazzjonijiet mal-partijiet kollha ikkonċernati dwar it-tieni fażi tal-proġett fosthom il-Kunsill Lokali, l-bejjiegħa tal-monti, l-GRTU li tirrappreżenta lis-sidien tal-ħwienet u lis-sajjieda.

Jidher ċar li ġew espressi pożizzjonijiet konflinġenti fuq il-proposta mill-partijiet ikkonsultati. Il-Gvern dejjem għamilha ċara, anki fil-laqgħat li kellu mal-partijiet konċeranti, li filwaqt li hu determinat li jkompli l-proġett, minn naħa l-oħra mhux dispost jonfoq flus pubbliċi biex jissebbaħ il-promenade biex dan jispiċċa ssirlu ħsara fi żmien qasir, jekk l-użu tiegħu jibqa’ kif inhu llum. Il-Gvern qed jevalwa l-options u fil-ġranet li ġejjin jieħu deċiżjoni ħalli l-proġett jitkompla.